വർണസമൃദ്ധമായ ഒരു അസ്തമയാകാശം
ഞാൻ ഇറക്കുമതി ചെയ്തു
വലയായ വലയെല്ലാം തിരഞ്ഞ് ഒരു ചെറുകിളിയെ
ഞാനതിൽ പിടിച്ചിട്ടു
ആരോ പങ്കു വച്ച ഒരു ചുവന്ന ഹൃദയം
ഞാനതിൽ ഒട്ടിച്ചു വച്ചു
അക്ഷരത്തെറ്റ് ഭയന്ന്, പകർപ്പെടുത്ത ആശംസാ സന്ദേശം
ഹൃദയത്തോട് പൊരുത്തപ്പെടുത്തി വച്ചു
അരികുകളിൽ പുഴയുടെ നീലിമ നിറച്ച്
അതിരുകൾ അടയാളപ്പെടുത്തി
അങ്ങനെ,
ചതുരാകാശവും,
പറക്കാക്കിളിയും,
തുടിക്കാഹൃദയവും,
ജീവനില്ലാവാക്കുകളും,
ഒഴുകാപ്പുഴയും
എന്റെ കൃത്രിമകൃതിയിൽ നിറഞ്ഞു
അത് മാലോകർക്കിതാ പങ്ക് വെയ്ക്കുന്നു
ഇഷ്ടക്കണക്കെടുക്കാൻ ഞാൻ കാത്തിരിക്കുന്നു.
No comments:
Post a Comment