Sunday, December 31, 2023

പരാജിതൻ

ഒരു പരാജിതൻ മരിച്ചുപോയി
പരാജിതനായത്കൊണ്ട്
ആത്മഹത്യ ചെയ്തുവെന്ന് പറഞ്ഞ്
അയാളുടെ
സ്വാഭാവികമരണാവകാശത്തെയും
എല്ലാവരും പരാജയപ്പെടുത്തി

അതിനുശേഷമാണ്
പുഴവക്കിലെ കായ്ക്കാമരത്തിൻ്റെ
ഉണക്കക്കൊമ്പിൽ
ആ കാക്കയിരുന്ന്
കരയാൻ തുടങ്ങിയത്

എന്നും രാത്രിയിൽ
ആ മരക്കൊമ്പ് ഒടിഞ്ഞ് വീഴും
പിറ്റേന്ന് മറ്റൊരു ഉണക്കക്കൊമ്പ്
ആ കാക്ക തിരഞ്ഞെടുക്കും

കാക്കയിരിക്കുമ്പോൾ
ആ മരക്കൊമ്പ്
ഉണങ്ങുന്നതാണെന്നാണ്
നിഷാദ് പറയുന്നത്

നിഷാദ് പരാജിതൻ്റെ
സുഹൃത്തായിരുന്നു

അവൻ ആ കാക്കയെ
പകയോടെ നോക്കുന്നത്
ഞാൻ കാണാറുണ്ട്

ഒരു ദിവസം അവൻ കല്ലെടുത്ത് 
കാക്കയെ ഉന്നം വക്കുന്നത് കണ്ട്
ഞാൻ ഉറക്കെയലറി

"അരുത് നിഷാദേ .."

അപ്പോഴേക്കും കല്ല് ഉന്നത്തിലെത്തി
അതുകണ്ട് ഞാൻ പോയി 
ഒട്ടും മഹത്തല്ലാത്ത
എന്തോ എഴുതി

2024

സ്വപ്നത്തിൽ കണ്ട ചിത്രശലഭം, രാവിലെയുണർന്നപ്പോൾ, അൽപനേരം വട്ടമിട്ട് പറന്ന് 2023 ലേക്ക് പറന്നുപോയി. അപ്പോഴതാ 2024 പതിയെ കിഴക്കുദിച്ചു വരുന്നു.

ഏവർക്കും പുതുവത്സരാശംസകൾ
- മധു

Thursday, December 28, 2023

വളരുന്ന കവിത

ഒന്നാം വരിയിൽ ഒന്നുമായില്ല
രണ്ടാം വരിയെ കണ്ടെടുത്തെഴുതി
മൂന്നാം വരിയെ മുനവച്ചെഴുതി
നാലാം വരിയിൽ നാട് മണത്തു
അഞ്ചാം വരിയിൽ കൊഞ്ചൽ നിറച്ചു
ആറാം വരിയിൽ ആറൊന്നൊഴുകി
ഏഴാം വരിയിൽ കേഴൽ പൊഴിഞ്ഞു
എട്ടാം വരിയെ കട്ടെടുത്തെഴുതി
ഒമ്പതാം വരിയിൽ ഒടുക്കത്തിലെത്തി
പത്താം വരിയെ കാത്തിരിപ്പാണ് ഞാൻ

Saturday, December 9, 2023

ചതുരചാരുത

ഒട്ടും സമമല്ലാത്ത ഒരു ചതുരം
കൈപ്പത്തിയെ അപഹരിച്ചു
അതിനകത്തെ ചെറു ചതുരത്തിൽ
വാർത്തകളും
പരസ്യങ്ങളും
പരദൂഷണങ്ങളും
തിടുക്കത്തിൽ നിരങ്ങി നീങ്ങി
അതിനൊപ്പം
മുഖപേശികൾ പണിപ്പെട്ട്
വികാരങ്ങളെ ചേരുംപടി ചേർത്തു
ഇടയിൽ കയറി വന്ന ഒരു കവിതയെ
വശങ്ങളിലെ കിടങ്ങിലേക്ക്
തള്ളിയിട്ട് നിഷ്ക്കരുണം കൊന്നു
ആ നിലവിളിശബ്ദം 
ആഴങ്ങളിലേക്കകന്ന് പോകുന്ന 
സ്വപ്നം കണ്ട് ചതുരം
ഇടക്കിടക്ക് ഞ്ഞെട്ടിവിറച്ചു
ചതുരത്തിന്റെ തലച്ചോറിൽ
പതിയെ അതൊരു രോഗമായി
പ്രതിവിധി രോഗാണുക്കൾ
വിഫലമായപ്പോൾ 
ഒരു മൂലയിൽ ഉപേക്ഷിക്കപ്പെട്ടു
ഊർജം വറ്റി വറ്റി ഒരുനാൾ
ചതുരം അനക്കമറ്റു

Wednesday, July 12, 2023

മറവിമുദ്രകൾ

മറക്കാതിരിക്കുവാൻ മനസ്സിൽ കുറിച്ചിട്ട മുദ്രകളൊക്കെയും മാഞ്ഞുപോയി
മറക്കില്ലൊരിക്കലും എന്നു പറഞ്ഞത് എന്തിനാണെന്നും മറന്നു പോയി

വരിയിൽ വിദ്യാലയ മുറ്റത്ത് നിൽക്കവെ
വഴി തെറ്റി വന്നൊരു നോട്ടമാണോ
അന്നൊരദ്ധ്യാപകൻ ചെവികളിൽ നൽകിയ
ചെറു നോവു ചേർന്നൊരു പാഠമാണോ
അത് കണ്ട് ചുറ്റിലും ചിരികളുണരവേ
ആർദ്രമായ് കണ്ടൊരാ കൺകളാണോ

മറക്കാതിരിക്കുവാൻ താളിൽ വരച്ചിട്ട
ചിത്രങ്ങളൊക്കെയും ചിതലരിച്ചു

തരളിത സ്വപ്നത്തിൽ ലളിതമായൊഴുകിയ
സരളമാം ഗാനത്തിനീണമാണോ
മാനത്ത് താരങ്ങൾ മിന്നിത്തിളങ്ങുമ്പോൾ
ചാരത്ത് ചിമ്മിയ താരദ്വയങ്ങളാണോ
തളരുന്ന വേളയിൽ താങ്ങായിയെത്തിയ
കൈകൾ പകർന്നൊരാ സ്നേഹമാണോ

മറക്കാതിരിക്കുവാൻ ചുവരിൽ വരഞ്ഞിട്ട
വാക്കുകളൊക്കെയും വികൃതമായി
മറക്കാതിരിക്കുവാൻ വൈദ്യൻ കുറിച്ചൊരാ
മറവിമരുന്നും മറന്നുപോയി

മറക്കാതിരിക്കുവാൻ മനസ്സിൽ കുറിച്ചിട്ട മുദ്രകളൊക്കെയും മാഞ്ഞുപോയി
മറക്കില്ലൊരിക്കലും എന്നു പറഞ്ഞത് എന്തിനാണെന്നും മറന്നു പോയി 

Thursday, June 15, 2023

ധ്യാനനിസ്വനം

ധ്യാനനിസ്വനം


കിളികളുറക്കെ ചിലക്കുന്നു ചുറ്റിലും 
എൻ്റെ ധ്യാനം മുടക്കുവാനായ് 
കൺകളിൽ കുത്തിതറക്കുന്നു പൊൻവെട്ടം 
എൻ്റെ ധ്യാനം മുടക്കുവാനായ് 
പുതുമഴയിലുണരുന്നു മണ്ണിൻ്റെ മണമെങ്ങും 
എൻ്റെ ധ്യാനം മുടക്കുവാനായ് 
തളിരിളം കുളിർകാറ്റ് വീശുന്നു മേനിയിൽ 
എൻ്റെ ധ്യാനം മുടക്കുവാനായ് 
തേൻവരിക്കച്ചക്ക വിണ്ടതിൻ രുചി നാവിലൂറുന്നു 
എൻ്റെ ധ്യാനം മുടക്കുവാനായ്  

ആര് മെല്ലെയെന്നരികത്തു വന്നിടുന്നു 
എൻ്റെ ധ്യാനം മുടക്കുവാനായ് 

ധ്യാനമാണ് ഞാൻ, അജ്ഞാതഗുരുവായി 
നിന്നരികിലെത്തുവാൻ വന്നതാണ് 
ധ്യാനമാണ് ഞാൻ, പഞ്ചേന്ദ്രിയങ്ങളിൽ 
നിന്നിലേക്കെത്തുവാൻ വന്നതാണ് 

ധ്യാനമാണ് ഞാൻ, 
..... പാട്ടിലെ പൊരുളായ്‌ 
..... അറിവിൻ്റെ വെട്ടമായ് 
..... ജീവൻ്റെ മണമായ്
..... കരുണയുടെ കുളിരായ് 
..... വിശപ്പിൻ്റെ രുചിയായ് 
വന്നതാണ് 

ധ്യാനമാണ് ഞാൻ, പഞ്ചേന്ദ്രിയങ്ങളിൽ 
നിന്നിലേക്കെത്തുവാൻ വന്നതാണ് 

Monday, February 20, 2023

ശബ്ദോദയം

ശബ്ദോദയം

ബോധനിറവ് ഊർജമായി
ഊർജസരസ്സിൽ കണങ്ങൾ കലപില കൂട്ടി
കോലാഹലം തരംഗങ്ങളായി
കർണപുടങ്ങളിൽ ശബ്ദമായി
കാലങ്ങളിൽ സഞ്ചരിച്ച് പരിണമിച്ചു
വാക്കുകളായി
വാക്കിലെ പൊരുളായി
ചിലത് ചിരിയായി
ചിലത് ചിന്തകളായി
ചിലത് മുറിവായി
ചിലത് വെറും ചിലപ്പായി
ചിലത് തരംഗങ്ങളൊത്ത്
വൃത്താകൃതിയിൽ വളർന്ന്
വൃത്തമില്ലാത്ത കവിതകളായി

ശബ്ദം ചുറ്റിലും നിറഞ്ഞു
ആക്രോശമായി
വാഹനങ്ങളുടെ കോലാഹലമായി

" വഴീടെ നടുവിലാ അവന്റെ സ്വപ്നം കാണല്
എടുത്തോണ്ട് പോടാ"

സമാധാനമായി

Thursday, January 12, 2023

തെരിയാ നേരുകൾ

തെരിയാ നേരുകൾ


തെരിയേണ്ടതെന്തെന്ന്
തെരിയണില്ലാ തേവരേ

കാണേണ്ട കാഴ്ചയെന്ത്
കേൾക്കേണ്ട കേൾവിയെന്ത്
അതിൽനിന്നും ചൊല്ലേണ്ട
കാര്യമെന്ത് തേവരേ

തെരിയേണ്ടതെന്തെന്ന്
തെരിയണില്ലാ തേവരേ

എടം തോളിൽ ഭാണ്ഡമുണ്ട്
വലം തോളിൽ ഭാണ്ഡമുണ്ട്
ഭാണ്ഡമേത് കനമെന്ന് 
തെരിയണില്ലാ തേവരേ

നേരായ വഴിയേത്
വളവുണ്ടോ തിരിവുണ്ടോ
വഴിയെത്ര ദൂരമുണ്ട്
കയറ്റിറക്കങ്ങളുണ്ടോ
തെരിയണില്ലാ തേവരേ
തെളിയണില്ലാ തേവരേ

വഴി കാട്ടാനാളുണ്ടോ
വഴിയെത്രയിരുളാണ്
ഇരുളിലും തെളിയണ
വെളിച്ചത്തിൻ പൊരുളെന്ത്
തെളിയണില്ലാ തേവരേ

അകമേത് പുറമേത്
അകമേത് പുറമേതെന്നറിയുവാൻ
വഴിയേത്
തെരിയണില്ലാ തേവരേ

ഏനേത് തേവരേത്
തെരിയണില്ലാ തേവരേ
തെളിയണില്ലാ തേവരേ