വന്മരനുണകൾ 

കുഞ്ഞേ,
നുണകളായിരുന്നു
നീ പഠിച്ച കഥയിൽ 

നുണ ഒന്ന് 

ഞാൻ അഹങ്കരിച്ചത്രേ 
കാറ്റിൽ ചെറുചെടിയുലഞ്ഞപ്പോൾ 

വന്മരവും ചെറുചെടിയും 
ഞങ്ങളാണെന്ന് 
ഞങ്ങൾക്കറിയില്ലല്ലോ 

വന്മരവും ചെറുചെടിയും 
ഭൂമിയല്ല എന്ന് 
നിങ്ങൾക്കല്ലേ അറിയൂ 


നുണ രണ്ട് 

കൊടുങ്കാറ്റിലാണ് 
ഞാൻ വീണതത്രെ 

നിങ്ങളുടെ
നുണകൾ കൊണ്ട് മൂർച്ചയേറ്റിയ
മഴുവല്ലേ എന്നെ വീഴ്ത്തിയത് 

നുണ മൂന്ന് 

കാറ്റിൽ നിലം പൊത്തിയ ചെറു ചെടി 
താനേ നിവർന്നുവത്രെ 

മണ്ണിൽ താണ് വളമായത് 
കനത്ത പാദുകങ്ങൾ കൊണ്ട് 
ചവിട്ടിയത് കൊണ്ടല്ലേ 

സത്യം, രണ്ടില്ലാത്തത്

ജീവവായുവിൻറെ വിലയറിയുമ്പോൾ 
ചെടികളിനിയും മുളക്കും
മരങ്ങളിനിയും വളരും 

പൂ മൊഴി

 പൂ മൊഴി 

തുമ്പപ്പൂവൊന്നിന്ന് മിഴി തുറന്നു
ഓണമായെന്നുള്ളൊരോർമയോടെ 
മുക്കുറ്റിപ്പൂക്കളെ കണ്ടു ചാരെ 
ചുറ്റിലും മഞ്ഞ വിരിച്ച പോലെ 

ചോദ്യമൊന്നാ പൂവിനുള്ളിൽ നിന്നും 
വെൺമയോടൊപ്പമാ കാറ്റിൽ ചേർന്നു

നിങ്ങളെയാരുമെറുത്തെടുത്ത് 
ചേമ്പിലതന്നിലടക്കിവച്ച് 
കുട്ടികൾ തീർക്കുമാ പൂക്കളത്തിൽ
വെറുമൊരു മഞ്ഞയായ് തീർത്തതില്ലേ  

പൊഴിയുവാറായൊരു പൂവു മെല്ലെ 
പുഞ്ചിരി തൂകി തിരിച്ചു ചൊല്ലി 

ഈ വർഷമറിയില്ല  കൂട്ടുകാരാ 
ആരുമേ വന്നില്ല പൂവിറുക്കാൻ

പൂമണമെയ്യുമ്പോൾ 
എത്തുന്ന വണ്ടിനു 
നറുതേൻ പകരുന്നു ഞങ്ങളിപ്പോൾ

ഇവിടെ പിറക്കുന്നു 
ഉറ്റോരെയറിയുന്നു 

കാറ്റിൽ കളിക്കുന്നു 
ഇവിടെ പൊഴിയുന്നു ഞങ്ങളിപ്പോൾ

ഈ വർഷമറിയില്ല  കൂട്ടുകാരാ 

ആരുമേ വന്നില്ല പൂവിറുക്കാൻ

അമ്പ് (Arrow)

അമ്പ് 

ഇണ പക്ഷി
അമ്പേറ്റ് 
ഇതിഹാസമായി 
ശേഷിപ്പ് 
തനിച്ചിരുന്ന് 
മഹാമുനിയായി