സമയം

നിങ്ങളറിയുന്നുവോ, ഞാനൊരു വരിയിൽ നിർത്തുന്നത്  നിങ്ങളുടെ സമയം അധികം അപഹരിക്കാതിരിക്കാനെന്ന്

ഉയരം

നട്ടുച്ചയോട് എനിക്ക് പിണക്കമാണ്

എന്റെ നിഴലിനെ ഇങ്ങനെ കുറുക്കിയില്ലെ?

സവിശേഷത

സവിശേഷത 

ഇങ്ങനെ സംഭവിക്കാൻ പാടില്ലാത്തതാണ്

ഇന്നത്തെ പുലരിക്ക് എന്തോ സവിശേഷതയുണ്ട്.

സൂര്യനുദിച്ചത് കിഴക്കു തന്നെയല്ലെയെന്ന് 

പടിഞ്ഞാട്ട് നോക്കി ഉറപ്പുവരുത്തി

അന്താരാഷ്ട്ര ഗൂഢാലോചന ഭയന്ന്

പത്രങ്ങളെല്ലാം പരതി

ബഹുരാഷ്ട്ര കുത്തക കടന്നുകയറ്റമാണോയെന്ന്

ജാലകം തുറന്ന് നിരീക്ഷിച്ചു

അന്യഗ്രഹ ജീവികൾ ദൂരദർശനിൽ

സംപ്രേഷണം എറ്റെടുത്തോ എന്ന് നോക്കി

ഒന്നുമില്ല

പിന്നെന്താണ് ഇങ്ങനെ

പെട്ടന്ന് കണ്ഠനാളത്തിൽ ഒരു കിരുകിരുപ്പ്

ഹാച്ഛീ.... ശക്തമായി തുമ്മി

കൃത്യം ആറുവട്ടം

ഹൊ സമാധാനമായി

ഇന്നത്തെ ദിവസവും സാധാരണം തന്നെ