പത്ര ഭയം

പത്ര ഭയം

വായിച്ചു തീർന്ന് വാർത്തകൾ വറ്റി
ഇരിപ്പിടങ്ങളായ പഴയ പത്രങ്ങൾ
നാടകം കഴിഞ്ഞപ്പോൾ
പൂരപ്പറമ്പിൽ ചിതറിക്കിടന്നു

മരിച്ചുപോയ മരങ്ങളുടെ
ചതഞ്ഞ്‌ പരന്ന ആത്മാക്കൾ
തലങ്ങും വിലങ്ങും
കിടക്കുന്ന ഒരു പത്രത്താളിലെ
ചെറിയ ചതുരങ്ങളിലിരുന്ന്
മരിച്ചു പോയവർ
മരിക്കാനിരിക്കുന്നവരെ
അനക്കമില്ലാതെ നോക്കി

ചതഞ്ഞരഞ്ഞ വാർത്തകളൂമായി
വതിലിൽ ആഞ്ഞിടിച്ച്‌
കോലായിൽ വന്നു വീണ പത്രം
പിടയാതെ മരിച്ചു

Balloon

അകത്ത് വായു നിറച്ച്
നിങ്ങളെന്നെ
കടുത്ത സമ്മർദ്ദത്തിലാക്കി

എന്നിട്ട് നൂലുകെട്ടി
പഴുതടച്ച്
തട്ടിക്കളിച്ച്
ആഹ്ളാദിച്ചു

ആകാശത്തിൽ
നിറയാൻ കൊതിച്ച്
അകത്ത് വായു
വിപ്ലവം തുടങ്ങി

ആരോ ഉണ്ടാക്കിയ
സൂചിപ്പഴുതിലൂടെ
പണ്ട് ഒന്നായിരുന്നവർ
ആർത്തട്ടഹസിച്ച്
വീണ്ടും ഒന്നായി

അതുകണ്ട്
ചിലർ ചിരിച്ചു
ചിലർ കരഞ്ഞു

ശേഷിപ്പുകൾ
പലയിടത്തായി
ചിതറിവീണ് ഞാൻ ഒരു
പ്രകൃതി ദുരന്തമായി

                       - ബലൂൺ