ബാഹ്യാസ്ഥി
ചിലന്തി - അസ്ഥിയെ പുറത്താക്കിയ ജീവി
അഹന്തയെ അകത്താക്കിയവർ അതിനെ വെറുത്തു
ജീവനൂൽ പൊട്ടിപ്പോയെങ്കിലും
ജാലകക്കമ്പിയിൽ ഒട്ടിച്ച ജഠരനൂലിൽ
ഒരു ബാഹ്യാസ്ഥിക്കൂടം തൂങ്ങിക്കിടന്നു
അരികെ പറന്ന ഒരു ചെറു പ്രാണി
ഭൂതകാല ഓർമയുടെ ഭയത്തിൽ
ഞെട്ടിത്തിരിഞ്ഞു പറന്നു പോയി
സ്വന്തം ഭാരമില്ലായ്മയിൽ നൊന്ത്
ബാഹ്യാസ്ഥിയപ്പോൾ വട്ടം തിരിഞ്ഞു
തൊലിയിലെ ചായങ്ങളും
ചമയങ്ങളും കട്ടപിടിച്ചവർ
ഉൾക്കാമ്പ് നഷ്ടപ്പെട്ടവർ
പൊങ്ങച്ച നൂലുകളിൽ തൂങ്ങി
ഭാരമില്ലായ്മ സ്വയം വിളമ്പരം ചെയ്തു
ഒരുനാൾ ഗർവോടെ കെട്ടിയ വല
മിന്നിത്തിളങ്ങുന്ന നൂലുകൾ
തനിക്കുമാത്രം അറിയുന്ന രഹസ്യവഴികൾ
വലയിൽ വീഴും ചെറുപ്രാണികൾ
എല്ലാം വലിയൊരു വലയിൽ വീഴും വരെ
പഞ്ചഭൂതങ്ങളിൽ ലയിക്കാൻ വിസമ്മതിച്ച്
ഈ ബാഹ്യാസ്ഥി മാത്രം കുറച്ച്നാൾ കൂടി
ചിലന്തി - അസ്ഥിയെ പുറത്താക്കിയ ജീവി
അഹന്തയെ അകത്താക്കിയവർ അതിനെ വെറുത്തു
ആത്മ രോഗം
പനിയില്ല ചുമ ഇല്ല കൈകാൽ കഴപ്പില്ല, തൊണ്ടയിൽ ഇല്ലൊരു വാക്കു പോലും
എന്നിട്ടുമെന്തിനോ ചെന്ന പാടേ, ഉയരമളന്ന് കുറിച്ചുവച്ചു, ഭാരമളന്നതിൽ ചേർത്തുവച്ചു
ശീതികരിച്ച മുറിയുടെ വാതിലിൽ പേരുണ്ട്, പേരിന്നു മുന്നിലും പിന്നിലും വാലുമുണ്ട്
കൈകളിൽ കിട്ടിയ യന്ത്രങ്ങളൊക്കെയെൻ, ദേഹത്തിനുള്ളിലും വെളിയിലും വച്ച് നോക്കി
ഗൗരവമെന്നെ ചുഴിഞ്ഞു നോക്കി പിന്നെ സഹതാപമോടെ പറഞ്ഞിങ്ങനെ
രണ്ടു ദിവസം കഴിഞ്ഞു വരൂ നിന്റെ പ്രശ്നങ്ങളൊക്കെയും തീർത്തു തരാം
രണ്ടു ദിനങ്ങൾക്ക് ശേഷമവിടെത്തി വാതിൽ തുറന്നു ഞാൻ അമ്പരന്നു
ശൂന്യമാണാ മുറി നടുവിലായുണ്ടൊരു മാമുനി താടി തടവിടുന്നു
അറിയുന്നു ഞാൻ നിന്റെ രോഗം, മകനേ നിനക്കാത്മ രോഗം
മാനവർ കരയുന്ന ശബ്ദങ്ങളൊക്കെയും ചെവികളിൽ കേൾക്കുന്നുവല്ലേ
മകനേ നിനക്കാത്മ രോഗം
ഞെട്ടറ്റു വീഴുന്നൊരിലയുടെ ശബ്ദവും ഭീകരമാകുന്നുവല്ലേ
മകനേ നിനക്കാത്മ രോഗം
പാടുന്ന കിളിയുടെ സങ്കടമൊക്കെയുംഹൃദയം തുളക്കുന്നുവല്ലെ
മകനേ നിനക്കാത്മ രോഗം
മറുമരുന്നെഴുതാനെഴുത്താണി നോക്കവേ, മുറിയാകെ പെട്ടെന്നു മാറി
മേശയ്ക്കു പുറകിലായ് ഗൗരവ മുഖമുണ്ട്, കൈകളിൽ കടലാസു കെട്ടുമുണ്ട്
എന്താണെന്നറിയില്ല പിന്തിരിഞ്ഞോടി ഞാൻ, ചുറ്റിലും ആളുകൾ കണ്മിഴിക്കെ
