ഞാൻ

ഞാൻ

ഈ വെറും ചെറുകണക്കൂട്ടത്തെ

ഞാനെന്നറിഞ്ഞതിൽ

വെറുതെയാർമാദിക്കുമെന്നജ്ഞതേ

നീയറിയുന്നുവോ

എന്നിലിന്നലയും

കണങ്ങളുടെയിന്നലെ

അവയുടെ നാളെയും

നിനവുകളും

ഇന്നലെ മാനത്ത് 

പാറിപ്പറന്നൊരാ

പറവ തൻ പ്രജ്ഞയോ

താഴത്ത് വീഴുന്നൊരവയുടെ കാഷ്ടമോ

പുഴുവിന്റെ തൃഷ്ണയോ

അവ തിന്നുമിലകളുടെ ഹരിതകമോ

അറപ്പിൽ പുളയുമവയുടെ മേനിയിൽ 

വിടരുവാൻ വെമ്പുന്ന ചിറകിന്റെ വർണമോ

മാനത്തൊളിക്കും ജലത്തിൻ കണികയോ

മഴയിൽ നനയുവാൻ, കുതിരുവാൻ

പൊള്ളും  വെയിലത്ത് 

കാത്തിരിക്കുന്നൊരാ

മണ്ണിന്റെ തരികളോ

കാറ്റത്ത് ഞെട്ടറ്റ് വീഴുമിലകളോ

അഴുകുമവയുടെ 

വളമുണ്ണുവാനായ്

മണ്ണിൽ പൊടിക്കുന്ന

ചെറുചെടിക്കൂട്ടമോ

കൂട്ടത്തിലൊരുവനെ

കൊല്ലുന്ന ക്രൂരനോ

ചിന്തുന്ന ചോരയോ

കണാത്ത കൺകളോ

മൗനമോ പേടിയോ

മലകളോ പുഴകളോ

മലയിൽ തപം ചെയ്ത

സന്യാസി വര്യരോ

തപസ്സിൽ പിറന്നൊരു

വേദ മന്ത്രങ്ങളോ

കവിതകൾ പൂവിടും

അജ്ഞാത ലോകത്തിൽ

എന്നോ വിടർന്നൊരീ

പൂവിൻ്റെയിതളുകൾ

കനവിൻ്റെ മുറ്റത്ത്

പൊഴിയും സുഗന്ധമോ

ഈ വെറും ചെറുകണക്കൂട്ടത്തെ

ഞാനെന്നറിഞ്ഞതിൽ

വെറുതെയാർമാദിക്കുമെന്നജ്ഞതേ

നീയറിയുന്നുവോ

എന്നിലിന്നലയും

കണങ്ങളുടെയിന്നലെ

അവയുടെ നാളെയും

നിനവുകളും